حافظ آباد؍ ننکانہ (نمائندہ خصوصی+نمائندہ نوائے وقت+ نامہ نگار) احمد پور چٹھہ کے قریب تیز رفتار کار نہر میں جا گرنے سے  2 دوست نہر میں ڈوب کر جاں بحق ہو گئے۔ ریسکیو 1122 کی امدادی ٹیموں نے لاشوں اور کار کو نہر سے نکال لیا۔ تفصیلات کے مطابق،گوجرانوالہ کے علاقہ لدھیوالہ کے رہائشی دو دوست محمد طارق اور ارسلان کار پر جا رہے تھے کے  کار تیز رفتاری کے باعث بے قابو ہوکر لوئر چناب نہر میں جا گری جس سے کار سوار دونوں افراد ڈوب کر جاں بحق ہو گئے۔ دریں اثناء بچیکی بڑا گھر روڈ پر رائس ملز کے قریب ایک تیز رفتار موٹر سائیکل کے وہیل میںچادر پھنس جانے سے موٹر سائیکل بے قابو ہوکر الٹ گئی‘ پیچھے سے آتی ہوئی لوڈ ٹریکٹر ٹرالی نے دونوں موٹر سائیکل سواروں کو بری طرح کچل دیا، جس کے نتیجہ میں 25سالہ ندیم عباس اور 20سالہ عبدالرزاق موقع پر ہی دم توڑ گئے جبکہ 18سالہ وقاص شدید زخمی ہو گیا۔