لاہور،کاہنہ (نوائے وقت رپورٹ+نامہ نگار)  مریم نواز نے کہا ہے کہ 8 فروری کو صرف شیر دھاڑے گا۔ عوام کو گھس بیٹھیوں کو اٹھا کر باہر پھینکنا ہے۔گجومتہ لاہور میں خطاب کرتے ہوئے انہوں نے کہا کہ گجومتہ والو! آپ کا بہت شکریہ،  آپ نے بھرپور استقبال کیا۔  شیر کو فتح یاب کراؤ وعدہ کرتی ہوں خدمت میں دن رات ایک کردوں گی۔ فیروز پور روڈ پر کہیں سپیڈو بس تو کہیں اورنج ٹرین  سب نواز شریف کی خدمت کے نشان ہیں۔ لاہور کو بتانا چاہتی ہوں مسلم لیگ (ن) نے خدمت کے ریکارڈ قائم کیے۔ جب گھس بیٹھیے آئے تو خدمت کے نشان وہیں رہ گئے۔ اورنج لائن کو کئی سال ثاقب نثار نے روک کر رکھا۔ تو پی ٹی آئی دور میں کوڑا اٹھانے والا نہیں تھا۔ انہوں نے مزید کہا کہ گھس بیٹھیوں کو آٹھ فروری کو اٹھا کر لاہور سے باہر پھینکنا ہے۔ اقتدار میں آکر پاکستان کی تقدیر بدلیں گے۔  آٹھ فروری کو کوئی گھر نہیں بیٹھے گا۔ جتنی تیزی سے شیر پر ٹھپے لگیں گے اتنی زیادہ ترقی آئے گی۔ مسلم لیگ ن فتح یاب ہوکر عوام کی  خدمت کیلئے دن رات ایک کر دے گی۔  سابق حکمرانوں نے ترقی کا پہیہ جام کر دیا تھا۔ لاہور کو لاوارث بنا دیا گیا تھا۔ سڑکوں پر کوئی کوڑا اٹھانے والا نہیں تھا۔ عوام 6 فروری کو ترقی کے دشمنوں کو اٹھا کر باہر پھینک دیں گے۔