فیصل آباد، فیروزوالہ‘ دھند سے حادثات‘ باپ بیٹا سمیت3جاں بحق، 20 زخمی
فیصل آباد، فیروزوالہ (نمائندہ خصوصی+نامہ نگار) دھند کے باعث ٹریفک حادثات میں باپ بیٹا جاں بحق اور پانچ افراد زخمی ہو گئے۔ سدھار بائی پاس روڈ پر تیز رفتار بس نے موٹر سائیکل سوار 60سالہ اختر ساکن وکیلانوالہ اور اسکے بیٹے 20سالہ عثمان کو کچل دیا‘ دونوں موقع پر جاں بحق ہو گئے جبکہ ڈرائیور فرار ہو گیا۔ نڑ والا روڈ پر دھند کے باعث دو کیری ڈبے سڑک کنارے گڑھے میں گرنے سے ڈرائیور اظہر جبکہ دوسرے کیری ڈبہ میں سوار مظہر، ممتاز بی بی، نواز اور قیصر ساکنان بھوآنہ شدید زخمی ہو گئے۔ علاوہ ازیں فیروزوالہ جی ٹی روڈ کی آبادی کالا شاہ کاکو کے قریب دھند کے باعث ٹرک بے قابو ہو کر رکشہ سے ٹکرا گیا جس کے نتیجہ میں رکشہ سوار کرامت علی موقع پر جاں بحق جبکہ 4 افراد زخمی ہوگئے جبکہ ٹرک ڈرائیور فرار ہو گیا۔ ایک اور واقعہ میں ٹپیالہ کے قریب ٹرک اور بس کے تصادم میں 11 مسافر زخمی ہو ئے۔دونوں واقعات کے زخمیو ں کو ہسپتال منتقل کردیا گیا۔ٹرک ڈرائیور موقع سے فرار ہونے میں کامیاب رہا۔علاوہ ازیں فیروزوالہ کی آبادی ونڈالہ دیال شاہ کے قریب نشے کا عادی نوجوان سردی کے باعث ہلاک ہوگیا‘ پولیس نے لاش پوسٹمارٹم کیلئے ہسپتال بھجوا دی تا ہم متوفی کی شناخت نہ ہو سکی۔
