لاہور (نامہ نگار) سابق گورنر پنجاب اور ق لیگ کے چیف آرگنائزر چودھری محمد سرور نے کہا ہے کہ انتظامیہ سے درخواست کرتا ہوں، بلاول بھٹو لاہور میں جلسہ کرنے آرہے ہیں، اگر بلاول بھٹو کو لیول پلینگ فیلڈ نہ ملی تو مشکل پیدا ہو جائے گی۔ وہ کرکٹ گراؤنڈ جلسہ گاہ میں پیپلز پارٹی کے ایڈیشنل سیکرٹری جنرل ذوالفقار علی بدر، پی پی لاہور کے صدر چودھری اسلم گل، فائزہ ملک اور دیگر کے ساتھ پریس کانفرنس سے خطاب کر رہے تھے۔ چودھری سرور نے کہا کہ پوسٹر اتارنے کا یہ مطلب ہے کہ بلاول بھٹو یہاں سے جیت رہا ہے، انہوں نے کہا کہ جس طرح بے نظیر شہید کا لاہور نے استقبال کیا تھا اسی طرح مجھے یقین ہے کہ بلاول لاہور سے ایم این اے بنے گا۔ ان کا کہنا تھا کہ بلاول بھٹو پاکستان کے وزیر اعظم بنیں گے۔ چودھری سرور نے واضح کیا کہ میں ق لیگ کا چیف آرگنائزر اور پنجاب کا صدر بھی ہوں، جہاں ق لیگ کا امیدوار نہ ہو وہاں پیپلز پارٹی کو سپورٹ کر رہا ہوں۔ ذوالفقار علی بدر نے کہا کہ بلاول بھٹو آج (اتوار) یہاں پر جلسے سے تاریخی خطاب کریں گے۔ انہوں نے مذید کہا کہ یہاں پر صرف ن لیگ کے پوسٹر اور فلیکس موجود ہیں مگر پیپلز پارٹی کے پینا فلیکس اتارے جا رہے ہیں۔ ہم اتوار کو بارہ بجے یہاں پر جلسہ کرنے جا رہے ہیں۔