لاہور (نوائے وقت رپورٹ) بلوچستان نیشنل پارٹی (بی این پی مینگل) کے سربراہ سردار اختر مینگل نے کہا کہ معلوم نہیں ووٹ کونسی مخلوق غائب کرتی ہے۔ کوئٹہ میں جلسے سے خطاب میں انہوں نے کہا کہ اب لوگوں نے 8 فروری سے پہلے ہی اپنا فیصلہ دے دیا ہے۔ انہوں نے کہا کہ الیکشن میں ہمیشہ عوام نے ہمیں ووٹ دیا، معلوم نہیں ووٹ کونسی مخلوق غائب کرتی ہے۔ سردار اختر مینگل نے مزید کہا کہ اس بار چار حلقوں سے انتخاب لڑ رہا ہوں۔ کوئٹہ اور قلات سے الیکشن اسمبلی میں جانے کیلئے نہیں لڑ رہا۔ انہوں نے کہا کہ الیکشن لڑنے کا مقصد یہ بتانا ہے کہ بلوچستان میں بسنے والوں کی وارث بی این پی ہے۔ انہوں نے یہ بھی کہا کہ کاغذات نامزدگی مسترد کروانے کیلئے ہمارے مخالفین سپریم کورٹ تک گئے۔