لاہور (سپورٹس رپورٹر) نیشنل ویمنز ٹی 20 ٹورنامنٹ میں گزشتہ روز کھیلے گئے میچوں میں راولپنڈی، لاہور اور کوئٹہ نے کامیابی حاصل کرلی۔ شعیب اختر کرکٹ گرائونڈ راولپنڈی میں راولپنڈی نے ملتان کو 27 رنز سے شکست دیدی۔ راولپنڈی نے 4وکٹوں کے نقصان پر 182رنز سکور کیے جس میں عالیہ ریاض کی جارحانہ سنچری قابل ذکر تھی۔ انہوں نے61گیندوں پر 17چوکوں اور 4چھکوں کی مدد سے 118 رنز اسکور کیے۔ ملتان کی ٹیم جواب میں 5وکٹوں پر 155رنز بناپائی۔ گل فیروزہ نے 11 چوکوں اور ایک چھکے کی مدد سے 78رنز بنائے۔ صائقہ ریاض نے 49رنز سکور کیے اور وہ آئوٹ نہیں ہوئیں۔ عالیہ ریاض نے پلیئر آف دی میچ ایوارڈ حاصل کیا۔ ایوب پارک گرائونڈ راولپنڈی میں لاہور نے کراچی کو 4 رنز سے ہرادیا۔ لاہور نے 7وکٹوں پر 128رنز بنائے بسمہ معروف نے47رنز کی اننگز کھیلی۔ فاطمہ ثنا اور عمیمہ سہیل نے دو دو وکٹیں حاصل کیں۔کراچی کی ٹیم 9وکٹوں کے نقصان پر 124رنز بنانے میں کامیاب ہوسکی۔ منیبہ علی 37رنز کے ساتھ ٹاپ سکورر رہیں۔ یسری عامر نے 35 رنز بنائے۔نشرہ سندھو نے عمدہ بولنگ کرتے ہوئے 19رنز دے کر 4وکٹیں حاصل کیں۔ بسمہ معروف نے 23رنز دے کر2کھلاڑیوں کو آئوٹ کیا۔بسمہ معروف کو پلیئر آف دی میچ قرار دیا گیا۔ ڈائمنڈ کرکٹ گرائونڈ اسلام آباد میں کوئٹہ نے پشاور کو 83 رنز سے شکست دیدی۔کوئٹہ نے پہلے بیٹنگ کرتے ہوئے 4وکٹوں پر 155رنز بنائے۔ فریحہ محمود نے 8 چوکوں کی مدد سے 56اور طوبی حسن نے 7 چوکوں اور ایک چھکے کی مدد سے 52 رنز سکور کیے۔پشاور کی ٹیم 72رنز بنانے میں کامیاب ہوسکی۔ عائشہ عاصم اور طوبی حسن نے تین تین وکٹیں حاصل کیں۔طوبی حسن کو پلیئر آف دی میچ قرار دیا گیا۔