فیصل آباد: 150 وارداتیں‘ ڈاکو 3 کروڑ روپے‘ 38 موٹر سائیکل لے اڑے
فیصل آباد (نمائندہ خصوصی) 150 وارداتوں میں تین کروڑ سے زائد نقدی، موبائل فونز، زیورات، قیمتی سامان، مویشی، رکشہ اور 38 موٹر سائیکل چھین لیے گئے۔ شہر اور نواحی علاقوں میں چوبیس گھنٹوں کے دوران دو فیکٹریوں، بیس گھروں، بارہ دوکانوں، دو دفاتر اور دو حویلیوں سے مجموعی طور پر دو کروڑ سے زائد نقدی، 35 تولہ زیورات، دس درجن موبائل فونز، لیپ ٹاپ، دو موٹر سائیکل، بجلی کے تار، مشینری، سولر پلیٹیں اور قیمتی سامان مسلح ڈاکو اور چور چھین کر چلتے بنے۔ مختلف مقامات پر چار شہریوں سے نقدی، موبائل فونز‘ موٹر سائیکل اور پچاس کے قریب شہریوں سے مجموعی طور پر 60 لاکھ سے زائد نقدی، پانچ درجن موبائل فونز، لیپ ٹاپ، طلائی زیورات اور قیمتی سامان چھین لیا گیا شہر اور نواحی علاقوں میں سے ایک رکشہ، بتیس موٹر سائیکلیں، ایک سائیکل، چھ بجلی میٹر، دو گیس میٹر، دو واٹر پمپ، چار پیٹر انجن، سولر پینل، فون ٹاور سے لاکھوں کی بیٹریاں اور دس زمینداروں کے چالیس لاکھ سے زائد کے مویشی نامعلوم چور لے اڑے۔
