نواز شریف آج گوجرانوالہ میں جلسہ سے خطاب کریں گے، تیاریاں مکمل
گوجرانوالہ (فرحان میر سے) قائد مسلم لیگ (ن) میاں محمد نوازشریف آج گوجرانوالہ میں بڑے جلسہ عام سے خطاب کریں گے۔ تمام تیاریاں مکمل، جناح سٹیڈیم میں بڑا سٹیج تیار‘ انتظامیہ اور پولیس کی طرف سے جلسہ گاہ کی حفاظت کیلئے خصوصی انتظامات مکمل کرلئے گئے۔ مقامی قیادت کی طرف سے اپنے ہر دلعزیز لیڈر کے شاندار استقبال کیلئے تیاریاں زور و شور سے جاری ہیں‘ متوالے اپنے قائد کی جھلک دیکھنے کیلئے بے تاب ہیں۔ میاں محمد نوازشریف کا لندن جلا وطنی کے بعد گوجرانوالہ کا پہلا دورہ ہے‘ چاہنے والے آج کئی سال بعد اپنے عظیم لیڈر کا براہ راست خطاب سنیں گے۔ گوجرانوالہ میں جلسہ کیلئے میاں شہباز شریف‘ مریم نواز‘ حمزہ شہباز اور دیگر مرکزی قائدین بھی میاں نوازشریف کے ہمراہ گوجرانوالہ آئیں گے۔ گوجرانوالہ کی مقامی لیگی قیادت جلسہ کو کامیاب ترین بنانے کیلئے پوری طرح متحرک ہوچکی ہے۔ بزرگ لیگی قائد غلام دستگیر خان کی زیر نگرانی مسلم لیگ (ن) کے امیدوار قومی و صوبائی اسمبلی اپنے حلقوں سے بڑے جلوسوں کے ہمراہ جلسہ گاہ میں شرکت کریں گے۔ جبکہ تنظیمی عہدیداران جلسہ کی تیاریوں میں دن رات مصروف ہیں۔ جلسہ عام سے میاں شہباز شریف‘ مریم نواز‘ حمزہ شہباز اور دیگر مرکزی قائدین کے علاوہ لیگی رہنما غلام دستگیر خان‘ قومی اسمبلی انجینئر خرم دستگیر خان‘ امیدوار قومی اسمبلی ڈاکٹر نثار احمد چیمہ‘چوہدری محمود بشیر ورک‘ذوالفقار بھنڈر‘شاہد عثمان ابراہیم‘ اظہر قیوم ناہرا‘ امیدواران صوبائی اسمبلی عمر فاروق ڈار، عمران خالد بٹ‘ امان اللہ وڑائچ، توفیق بٹ‘ بلال فاروق تارڑ‘ معظم رؤف مغل‘ کامران خالد بٹ‘ محمد نواز چوہان‘ توفیق بٹ‘ احسن ڈار‘ پیر غلام فرید‘ قیصر اقبال سندھو‘ رانا اختر علی خان‘ چوہدری اقبال گجر‘ عرفان بشیر گجر‘ سٹی صدر مسلم لیگ (ن) سلمان خالد پومی بٹ‘ محمد شعیب بٹ حاجی احمد ودیگر قائدین بھی خطاب کریں گے۔
