8 فروری کو جی ڈی اے‘ بی ڈی اے نہیں صرف تیر چلے گا: آصفہ بھٹو
سکھر (نوائے وقت رپورٹ) آصفہ بھٹو نے کہا ہے کہ 8فروری کو جی ڈی اے، بی ڈی اے نہیں صرف تیر چلے گا۔ آصفہ بھٹو نے انتخانی مہم کے دوران سکھر میں نکالی گئی ریلی کے شرکاء سے گفتگو میں کہا کہ ہم مل کر کام کریں گے تو دنیا کی کوئی طاقت ہمیں ترقی کرنے سے نہیں روک سکتی۔ آج میری سالگرہ ہے، میری اس موقع پر ایک ہی خواہش ہے کہ آپ 8 فروری کو تیر پر مہر لگا کر اسے کامیاب بنائیں۔ دوسری جماعتیں امیروں کو مزید امیر اور غریبوں کو غریب کرنا چاہتی ہیں۔ بلاول بھٹو وزیراعظم بنے گا تو وہ آپ غریبوں کیلئے لڑے گا، ووٹ کی طاقت آپ کی ہے، آپ نے اس کا صحیح استعمال کرنا ہے۔ اگر آپ ووٹ کو صحیح استعمال کریں گے تو پاکستان مضبوط ہو گا۔ بے نظیر بھٹو بھی آپ کے حق کیلئے لڑتی تھیں، ہم بے نظیر انکم سپورٹ پروگرام کے تحت لاکھوں خواتین کی مدد کر رہے ہیں۔ ہماری جماعت غریبوں کے حقوق کیلئے لڑ رہی ہے۔
