گوجرانوالہ+ نارنگ منڈی+ فیروز والا (نمائندہ خصوصی+ نمائندہ نوائے وقت + نامہ نگار) پوسٹر لگانے کے تنازعہ پر نوجوان کو فائرنگ کر کے زخمی کر دیا گیا۔ تھانہ سول لائن کے علاقہ بیکو پور میں مظہر نامی نوجوان پی ٹی آئی کے حمایت یافتہ آزاد امیدوار مبین عارف جٹ کے پوسٹر چسپاں کر رہا تھا، جھگڑے کے دوران فیاض اور اس کے بھائی نے فائرنگ کر کے مظہر کو زخمی کر دیا۔ زخمی نوجوان کو فوری طور پر ڈی ایچ کیو ہسپتال منتقل کر دیا گیا۔ مبین عارف جٹ مسلم لیگ (ن) کے امیدوار انجینئر خرم دستگیر خان کے مد مقابل ہیں۔ دریں اثنا نارنگ موڑ پر تحریک انصاف کے جلسے کے دوران مسلم لیگ ن کے امیدواروں کا قافلہ گزرا تو پی ٹی آئی کارکنوں نے ’’چور آیا چور آیا‘‘ کے نعرے لگائے جس پر مسلم لیگ ن کے قافلے میں موجود ایک گاڑی سے فائرنگ کی گئی۔ بعد ازاں پی ٹی آئی کارکنوں کی جانب سے ہوائی فائرنگ کی گئی۔ پولیس موقع پر پہنچ گئی۔ دہشتگردی دفعات کے تحت مقدمہ درج کر لیا جبکہ دونوں پارٹیوں کے ملزم گرفتار کر لئے۔ ڈی پی او زاہد انور مروت نے کہا کسی کو قانون ہاتھ میں لینے کی اجازت نہیں دیں گے۔ جبکہ آہدیاں میں انتخابی مہم کے دوران اسلحہ کی نمائش کرنے والوں کے خلاف بھی مقدمات درج کر لئے۔