لاڑکانہ (نوائے وقت رپورٹ) آصفہ بھٹو زرداری نے کہا کہ پیپلزپارٹی کو حکومت ملی تو عوام کو لاکھوں گھر تعمیر کرکے دیں گے۔ آصفہ بھٹو زرداری نے لاڑکانہ میں پیپلزپارٹی کے کنونشن سے خطاب کرتے ہوئے کہا کہ آج شہر ہو یا گاؤں ہم مفت علاج دیتے ہیں، جو کسی دوسرے صوبے میں موجود نہیں ہے۔ صرف بھٹو خاندان اور ان کی پارٹی غریبوں کی تکلیف سمجھتی ہے‘ 300 یونٹ بجلی مفت دیں گے۔ ہم نے لاڑکانہ میں ریسکیو 1122 شروع کی‘ پیپلز بس سروس شروع کی۔ جب تاریخی سیلاب آیا‘ بلاول آپ کے ساتھ کھڑے تھے۔ سیلاب متاثرین کے لئے گھر بنائے‘ لوگوں کو مالکانہ حقوق دلوائے۔ پی پی پی رہنما نے مزید کہا کہ بلاول بھٹو زرداری نے کچی آبادی کو ریگولائز کروایا۔ صرف پیپلز پارٹی آپ کے گھر اور روزی روٹی کا سوچتی ہے۔