لاہور(سپورٹس رپورٹر)پاکستان سپرلیگ 2024 کے ٹکٹوں کی فروخت مقررہ وقت پر شروع نہ ہوسکی۔پاکستان کرکٹ بورڈ جانب سے ویب سائٹ pcb.tcs.com.pk پر ٹکٹوں کی آن لائن بکنگ منگل کو شام 5 بجے شروع ہونے کی خوش خبری سنائی گئی تھی مگر مقررہ وقت کے بعد بھی ویب سائٹ کا سرور ہی ڈائون ہوگیا اور ٹکٹوں کی فروخت شروع نہ ہوسکی۔پی ایس ایل کے ٹکٹ نہ ملنے پر مداحوں نے پریشانی کا اظہار کیا اور مایوس شائقین میڈیا دفاتر میں فون کرکے بکنگ کا آغاز نہ ہونے کی وجوہات جاننے کی کوشش کرتے رہے۔ پی ایس ایل9 کا آغاز 17 فروری کو لاہور میں ہوگا جہاں2  بار کی چیمپئن لاہور قلندرز کا مقابلہ اسلام آباد یونائیٹڈ سے ہوگا جبکہ فائنل 18 مارچ کو کراچی میں کھیلا جائیگا۔پی سی بی نے اعلان کیا تھا کہ ٹکٹوں کی آن لائن فروخت 6 فروری کو شروع ہوگی اور ٹکٹ کی کم ازکم قیمت ایک ہزار اور زیادہ سے زیادہ 18 ہزار روپے ہوگی۔ٹکٹوں کے حوالے سے بورڈ نے بتایا تھا کہ پہلے مرحلے میں ملتان اور کراچی میں ہونیوالے میچوں کی ٹکٹیں دستیاب ہوں گی جبکہ دوسرے مرحلے میں لاہور اور راولپنڈی میں ہونیوالے میچوں کی ٹکٹیں دستیاب ہوں گی، بورڈ کی جانب سے ہر میچ کے لیے ٹکٹوں کی قیمت مختلف رکھی گئی ہے۔لاہور میں جنرل سٹینڈ کی ٹکٹ ساڑھے 6 سے 1200 روپے تک کی رکھی گئی ہے، کراچی اورملتان میں جنرل سٹینڈز کا ٹکٹس 650 سے 1000 روپے، لاہور کے ہاسپٹیلٹی بکس کی ٹکٹ 10 سے 18 ہزار مقرر کی گئی ہے، کراچی میں ہاسپٹیلٹی بکس کی ٹکٹس کی قیمت 10 سے 15 ہزار روپے، ملتان کے ہاسپٹیلٹی بکس کی قیمت 12 سے 18 ہزار روپے ہے، راولپنڈی میں پریمیئم ٹکٹس ایک ہزار سے 2500 روپے اور پلاٹینم بکس کی قیمت 12 ہزار سے 18 ہزار تک ہوگی۔