فیروزوالہ (نامہ نگار) ریان پورہ (مریدکے) کے قریب ٹرک اور کار کے درمیان ہولناک تصادم کے  نتیجہ میں کار سوار ایک ہی خاندان کے سات افراد ہلاک جبکہ دو افراد زخمی ہو گئے۔ ہلاک ہونے والوں میں میاں بیوی اور ان کے تین بچے اور دو رشتہ دار شامل ہیں۔ حادثہ کے بعد ٹرک ڈرائیور فرار ہو گیا۔ تفصیلات کے مطابق سیٹلایٹ ٹائون گوجرانوالہ کے رہائشی ظہیر عباس اپنی بیوی ارم شہزادی اور بچوں کے ہمراہ کبیر والا شادی کی تقریب سے فارغ ہو کر واپس گوجرانوالہ جا رہے تھے جب ان کی  کار ریان پورہ (مریدکے) کے قریب پہنچی تو تیز رفتار مزدا ٹرک کے ڈرائیور نے تیز رفتاری کے باعث یوٹرن پر موڑ کاٹنے لگا تو ٹرک بے قابو ہو کر کار سے ٹکرا گیا۔ ہولناک تصادم کے باعث کار سوار ظہیر عباس، اس کی بیوی ارم شہزادی، تین بچوں سمیت سات افراد ہلاک جبکہ دو بچے زخمی ہو گئے۔ ہلاک ہونے والوں میں متوفی ظہیر عباس کے تین بچے عبدالوہاب 10 سالہ، ایان 8 سالہ، ایمان فاطمہ 6 سالہ جبکہ متوفی ظہیر عباس کا برادر نسبتی شہباز 22 سالہ، ساس نسیم بی بی 40 سالہ ہلاک جبکہ دو بچے زخمی ہو گئے، جنہیں طبی امداد کے لیے ہسپتال داخل کرا دیا۔