لاہور(سپورٹس رپورٹر)پاکستان سپر لیگ کی فرنچائز اسلام آباد یونائیٹڈ کے کپتان شاداب خان نے اعتراف کیا ہے کہ ماضی میں ان کی پرفارمنس پر ٹھیک تنقید ہوئی۔پی ایس ایل کے آغاز سے قبل پریس کانفرنس میں شاداب خان نے کہا کہ ٹی ٹونٹی کرکٹ میں آل راؤنڈر کا کردار ہوتا ہے، آج کل آل راؤنڈر سے ہی اچھا کمبی نیشن بنتا ہے، دباؤ ہوتا ہے ایسا نہیں ہے کہ دفاع کبھی نہیں ہوتا، مجھ پر تنقید درست تھی، میں اچھا پرفارم نہیں کر رہا تھا۔ وہ ماضی کا حصہ ہے، اب اچھے مائنڈ سیٹ کیساتھ آیا ہوں، غلطیوں کو دور کرنے کی کوشش کی ہے، ہم ماضی میں دباؤ میں اچھا نہیں کھیل سکے، ہمارے پاس چیمپئن پلیئرز ہیں اس مرتبہ اچھا پرفارم ہو گا، ہمیں ماضی میں انجریز کا سامنا رہا ہے۔ ورلڈ کپ اور ایشیا کپ میں اچھا پرفارم نہیں کر سکا، اس سے پہلے میں اچھا کھیل رہا تھا، مجھے خود پر اعتماد ہوتا ہے اور یقین بھی ہوتا ہے میں اچھا کم بیک کروں گا، ہمیں ٹیم کی حیثیت سے اچھا کھیلنا ہے۔