کراچی(این این آئی)شہر قائد کراچی کے علاقے صدر میں واقع ہوٹل کی لفٹ گرنے سے 3 سندھ گیمز میں شرکت کے لیے آئے 2ایتھلیٹس کھلاڑیوں سمیت 3افراد زخمی ہو گئے،وزیر کھیل سندھ کے مطابق زخمیوں کی حالت اب بہتر ہے۔تفصیلات کے مطابق لفٹ میں گنجائش سے زیادہ افراد داخل ہونے کی وجہ سے حادثہ پیش آیا جس کے نتیجے میں 3 افراد زخمی ہو گئے، زخمیوں میں ویٹ لفٹنگ کے 2 ایتھلیٹ اور ایک سیکرٹری شامل ہے۔حادثے کے بعد ریسکیو ٹیم موقع پر پہنچ گئی اور زخمی ہونے والوں کو ہسپتال منتقل کر دیا جہاں انہیں طبی امداد دی جا رہی ہے، زخمی ہونے والے تینوں افراد سندھ گیمز میں حصہ لینے کیلئے آئے تھے۔اس ضمن میں نگراں صوبائی وزیر کھیل جنید علی شاہ نے بتایاکہ متعلقہ ایتھیلیٹس سندھ گیمز میں شرکت کے لیے میر پورخاص سے آئے تھے، کھلاڑی تو زخمی ہوئے تاہم انہیں بہترین طبی امداد فراہم کی جا رہی ہیں۔لفٹ گرنے کے واقعے سے متعلق انہوں نے بتایا کہ 3 افراد کی گنجائش کے باوجود لفٹ میں 9 افراد کے سوار ہونے سے حادثہ پیش آیا، نگراں وزیر کھیل نے بتایا کہ انہوں نے لفٹ مین گنجائش سے متعلق ہوٹل انتظامیہ کو آگاہ کیا تھا۔