لاہور (خصوصی نامہ نگار + این این آئی) وزیراعلی پنجاب مریم نواز شریف نے کہا ہے کہ یہ خاتون کی فتح ہے، ماں کی فتح ہے، ماں بیٹی ہونا خوابوں کی تعبیر میں رکاوٹ نہیں ہو سکتیں۔ والدہ کا شکریہ جنہوں نے حالات کے لئے تیار کیا، والدہ کو اللہ کریم کروٹ کروٹ جنت عطا کرے، والدہ نے مجھے تمیز کا دامن نہ چھوڑنے کی نصیحت کی۔ بتایا آپ کو ٹف ہونا ہو گا۔ مریم نواز جب ایوان میں آئیں تو انہوں اپنی نشست کے سامنے اپنی مرحومہ والدہ بیگم کلثوم نواز کی تصویر رکھی ہوئی تھی۔ مریم نواز کی تقریر کے دوران بھی پارٹی ورکر نعرے بازی کرتے رہے جنہیں نہ صرف سپیکر روکتے رہے بلکہ مریم نواز کو بھی نعرے بازی سے انہیں روکنا پڑا۔ مریم نواز شریف نے کہا ہے کہ میں اپنی درسگاہوں، اپنے اساتذہ اور پرنسپل کی شکرگزار ہوں، لاہور کالج فار وومین جہاں سے ایف ایس سی میں تعلیم حاصل کی اور پنجاب یونیورسٹی سے ایم اے کیا، ان کا سب شکریہ ادا کرتی ہوں۔ مریم نواز نے وزیراعلیٰ کے انتخاب میں حصہ لینے سے قبل والدہ اور دیگر عزیز و اقارب کی قبروں پر فاتحہ خوانی کی۔