راولپنڈی (این این آئی) پاک فوج نے لائن آف کنٹرول (ایل او سی) پر بھارتی فوج کا ایک اور جاسوس کواڈ کاپٹر مار گرایا۔ پاک فوج کے شعبہ تعلقات عامہ (آئی ایس پی آر) کی جانب سے جاری بیان کے مطابق 26 فروری کو جاسوسی کرنے والے بھارتی فضائیہ کے کواڈ کاپٹر کو مار گرایا گیا۔ بھارتی فضائیہ کے کواڈ کاپٹر کی باقیات پاکستانی علاقے سے مل گئیں۔ کواڈ کاپٹر پر بھارتی فضائیہ کے ایک یونٹ کا نشان بھی موجود ہے۔ واضح رہے کہ پاک فوج نے ایل او سی پر جنوری 2021 ء میں بھی بھارتی جاسوس ڈرون مار گرایا تھا۔ یہ بھارتی کواڈ کاپٹر پاکستانی حدود میں 500 میٹر تک گھس آیا تھا۔ اس سے قبل یکم جنوری کو بھی پاک فوج نے نوشیری سیکٹر میں بھارتی کواڈ کاپٹر مار گرایا تھا۔2020 ء میں پاک فوج نے بھارت کے لگ بھگ درجن بھر جاسوس ڈرون مار گرائے تھے۔ خیال رہے 2019 ء میں پاک فوج نے بھارت کے 3 ڈرون مار گرائے تھے۔