لاہور (سپورٹس رپورٹر)  پاکستان کرکٹ ٹیم کے لیے غیر ملکی کوچز کی تلاش ہنگامی بنیادوں پر شروع کرنے کا فیصلہ کیا گیا ہے۔ چیئرمین پی سی بی محسن نقوی کی ترجیح قومی ٹیم کیلئے مضبوط سپورٹ سٹاف کی تلاش ہے اور کوچنگ اسٹاف سے متعلق آئندہ ہفتے پیشرفت کا امکان ہے۔  چیئرمین پی سی بی نے پاکستانی ٹیم کیلئے غیر ملکی کوچز کی تلاش کا کام ہنگامی بنیادوں پر شروع کرنے کا فیصلہ کیا ہے۔ بڑے ناموں والے کوچز کی لیگز میں مصروفیات کے باعث مشکلات کا سامنا کرنا پڑ سکتا ہے اس لیے فوری طور پر غیر ملکی کنسلٹنٹس اور ملکی کوچز کا آپشن بھی موجود ہے۔ پاکستان ٹیم نے اپریل کے وسط میں نیوزی لینڈ کیخلاف ٹی ٹونٹی سیریز کھیلنی ہے، 5 ٹی ٹونٹی میچز کی سیریز راولپنڈی اور لاہور میں 18 اپریل سے شروع ہو گی۔ ٹی ٹونٹی ورلڈ کپ سے قبل پاکستان نے آئر لینڈ اور انگلینڈ کیخلاف بھی ٹی ٹونٹی سیریز کھیلنی ہیں۔