نیوزی لینڈ کرکٹ کا 2رکنی سکیورٹی وفد پاکستان پہنچ گیا
لاہور(سپورٹس رپورٹر)نیوزی لینڈ کرکٹ کا دو رکنی سکیورٹی وفد پاکستان پہنچ گیا، وفد میں نیوزی لینڈ پلیئرز ایسوسی ایشن کے ہیتھ ملز اور آزاد سکیورٹی ماہر رگ ڈیکاسن شامل ہیں۔ذرائع کے مطابق پہلے مرحلے میں وفد اسلام آباد اور راولپنڈی میں انتظامات کا جائزہ لے گا، وفد ٹیم ہوٹل اور پنڈی سٹیڈیم بھی جائیگا جہاں انہیں اعلی سطح کی بریفنگ بھی دی جائیگی۔ دوسرے مرحلے میں وفد لاہور میں انتظامات کا جائزہ لے گا، اور ان کا ٹیم ہوٹل اور سٹیڈیم کا دورہ شیڈولڈ ہے۔نیوزی لینڈ کی ٹیم کو اپریل میں پانچ ٹی ٹونٹی میچز کی سیریز کیلئے پاکستان کا دورہ کرنا ہے، دورے سے قبل سکیورٹی وفد کا انتظامات کا جائزہ لینا معمول کی بات ہے۔مجوزہ شیڈول کے مطابق نیوزی لینڈ کی ٹیم 14 اپریل کو پاکستان پہنچے گی، 28اپریل تک جاری رہنے والے دورے میں پہلا ٹی ٹونٹی میچ 18اپریل کو ہوگا۔ذرائع نے بتایا کہ پہلے مرحلے میں تین میچز راولپنڈی اور دوسرے مرحلے میں دو میچز لاہور میں تجویز کیے گئے ہیں۔