اسلام آباد (نوائے وقت رپورٹ) سنی اتحاد کونسل نے اپوزیشن لیڈر کی نامزدگی کیلئے درخواست سپیکر آفس میں جمع کرا دی۔ عمر ایوب کی بطور اپوزیشن لیڈر نامزدگی کی باضابطہ درخواست دیدی پی ٹی آئی رہنماؤں عامر ڈوگر، علی محمد خان اور دیگر نے درخواست سپیکر آفس  میں جمع کرائی۔ دوسری جانب تحریک انصاف نے الیکشن کمشن سے بلے کا انتخابی نشان واپس مانگ لیا۔ تحریک انصاف نے الیکشن کمشن میں انٹرا پارٹی انتخابات کا ریکارڈ جمع کرا  دیا تحریک انصاف کے فیڈرل الیکشن کمشنر نے انٹرا پارٹی انتخابات کا ریکارڈ جمع کرایا، پی ٹی آئی نے فارم 65 پر مشتمل پارٹی سربراہ کا سرٹیفکیٹ بھی جمع کرایا۔ تحریک انصاف کی دستاویز میں مرکزی و صوبائی قیادت کے انتخاب کے نتائج بھی شامل ہیں۔