لاہور(سپورٹس رپورٹر ) پاکستان سپر لیگ9میں آج مزید دو میچوں کا فیصلہ ہو گا۔لیگ کے 27ویں میچ میں اسلام آباد یونائیٹڈ اور ملتان سلطانز کی ٹیمیں راولپنڈی کرکٹ سٹیڈیم میں مدمقابل ہوں گی ، میچ دن2بجے شروع ہو گا ۔ اسلام آباد یونائیٹڈ کوشاداب خان لیڈ کر رہے ہیں۔ ملتان سلطانز وکٹ کیپر بیٹر محمد رضوان کی قیادت میں میدان میں اترے گی۔ لیگ کا 28 واں میچ کوئٹہ گلیڈی ایٹرز اور لاہور قلندرز کے درمیان نیشنل سٹیڈیم کراچی میں کھیلا جائیگا۔میچ شام سات بجے شروع ہوگا ۔ کوئٹہ گلیڈی ایٹرز رائیلی روسو کی زیر قیادت میں میدان میں اتریگی۔لاہور قلندرز کو شاہین شاہ آفریدی لیڈ کریں گے ۔ قومی ٹیم اور لاہور قلندرز کے ٹی20کپتان شاہین آفریدی نے بابراعظم کیساتھ اپنی لڑائی سے متعلق افواہوں پر خاموشی توڑ دی۔انہوںنے کہا کہ ہمیں کسی کے سامنے خود کو درست ثابت کرنے کی ضرورت نہیں، ٹیم میٹنگ میں ہم جانتے ہیں کہ کیا کہنا ہے اور کیا نہیں۔ بابر اور میں پاکستان کیلئے کھیلتے ہیں، ہمارے تعلقات ایک خاندان کی طرح ہیں جو اپنی چیزیں خود سلجھا سکتے ہیں۔ کبھی کبھی ایسے پیش کیا جاتا ہے کہ بابراعظم اور میرے درمیان کوئی اختلاف ہے، ہماری لڑائی ہوئی ہو‘ایسا نہیں ہونا چاہیے، ہم ایک دوسرے سے اتنا ہی پیار کرتے ہیں جتنا ہم اپنے خاندان سے کرتے ہیں۔ میڈیا رپورٹس میں یہ بات سامنے آئی تھی کہ 2023ء ایشیاکپ کے سپر فور مرحلے میں سری لنکا کیخلاف میچ میں شکست کے بعد کپتان بابر اعظم اور شاہین شاہ آفریدی کے درمیان ڈریسنگ روم میں تلخ کلامی ہوئی تھی۔