لاہور(سپورٹس رپورٹر)پاکستان ڈیف کرکٹ ٹیم نے سری لنکا کو شکست دے کر ٹی ٹونٹی ورلڈ کپ جیت لیا۔ڈیف انٹرنیشنل کرکٹ کونسل ٹی ٹونٹی ورلڈ کپ 2024 کے فائنل میں پاکستان ڈیف کرکٹ ٹیم نے سری لنکا کو 88 رنز سے ہرایا۔شارجہ میں کھیلے گئے میچ میں پاکستان ڈیف ٹیم نے مقررہ 20 اوورز میں 6 وکٹ پر 151 رنز بنائے، ہدف کے تعاقب میں سری لنکا کی ٹیم 63 رنز بنا کر آؤٹ ہوگئی۔ ڈیف انٹرنیشنل کرکٹ کونسل ٹی ٹونٹی ورلڈ کپ شارجہ میں کھیلا گیا جس میں 6 ٹیموں نے حصہ لیا تھا۔ چیئرمین پی سی بی محسن نقوی نے ٹی ٹونٹی ورلڈ کپ 2024 جیتنے پر پاکستانی ڈیف کرکٹ ٹیم کے کھلاڑیوں کو مبارک باد دی ہے۔چیئرمین پی سی بی محسن نقوی نے کہا کہ پاکستانی ڈیف کرکٹ ٹیم کے کھلاڑیوں نے فائنل میں شاندار کارکردگی کا مظاہرہ کیا ، باسط عباسی نے بلے بازی جبکہ جبار علی اور منظور خان نے بائولنگ میں بہترین کارکردگی دکھائی۔ ڈیف کرکٹ کے کھلاڑیوں نے ٹیم ورک اور محنت کیساتھ فائنل میں سری لنکا کو شکست دی، میرا یقین ہے کہ جذبے، ٹیم ورک اور عزم ہی کامیابی کی کنجی ہے۔