لاہور(سپورٹس رپورٹر)پاکستان کرکٹ بورڈ نے  پاکستان کپ ویمنز ون ڈے ٹورنامنٹ کے شیڈول کا اعلان کردیا ہے۔ 50 اوورز کے  ٹورنامنٹ میں چھ ریجنل ٹیمیں حصہ لیں گی۔ون ڈے ٹورنامنٹ 17 اپریل سے شروع ہوگا اور 11 مئی کو اختتام پذیر ہوگا جس کی دو ٹاپ ٹیمیں اقبال سٹیڈیم فیصل آباد میں مدمقابل ہونگی۔چھ ریجنل ٹیمیں کراچی‘لاہور‘ملتان‘ پشاور‘کوئٹہ اور راولپنڈی شامل ہیں۔ ٹورنامنٹ ڈبل لیگ کی بنیاد پر کھیلا جائیگا جس میں ہر ٹیم کو کم از کم 10 میچز کھیلنے کا موقع ملے گا۔ 25 روزہ ٹورنامنٹ میں کل 31 میچ کھیلے جائیں گے۔ میچ کا آغاز صبح ساڑھے9 بجے ہوا کریگا۔ سلیم جعفر کی سربراہی میں خواتین کی چار رکنی قومی سلیکشن کمیٹی نے ٹورنامنٹ میں حصہ لینے والے چھ  سکواڈز کا اعلان کر دیا ہے۔ کراچی اور لاہورکی ٹیمیں  15 کھلاڑیوں پر مشتمل ہونگی جبکہ بقیہ ٹیمیں 14 کھلاڑیوں پر مشتمل ہونگی۔ان چار ٹیموں کی پندرہویں کھلاڑی ویسٹ انڈیز کیخلاف اعلان کردہ پاکستان ویمنز کی بیس ممکنہ کھلاڑیوں میں سے منتخب کی جائیں گی۔ ان کھلاڑیوں کو پاکستان ویمنز ٹریننگ کیمپ کے اختتام پر ریلیز کردیا جائیگا۔ ہر ٹیم پانچ ریزرو کھلاڑیوں پر مشتمل ہوگی۔