14 برس میں پاکستانی ٹیم نے 10 ٹی20 کوچز تبدیل کر دیئے: راشد لطیف
لاہور(سپورٹس رپورٹر) پاکستانی ٹیم نے 14 برس میں 10 ٹی20 کوچز تبدیل کرڈالے۔ سابق کپتان راشد لطیف نے ٹی 20 کوچز کے حوالے سے دلچسپ اعدادوشمار پیش کیے۔ 2011سے اب تک پاکستان کی جانب سے ٹی 20کرکٹ میں 10 کوچز کا تقرر کیا گیا، ان میں عبدالرحمان، ڈیو واٹمور، گرانٹ بریڈبرن، مکی آرتھر، مصباح الحق، محمد حفیظ، محسن حسن خان، معین خان، ثقلین مشتاق اور وقار یونس شامل ہیں۔ ٹیم نے مختصر فارمیٹ میں سب سے زیادہ فتوحات مکی آرتھر کی رہنمائی میں حاصل کیں، ان کی کامیابیوں کا تناسب 81.08 رہا، دوسرے نمبر پر ثقلین مشتاق رہے، ان کے دور میں گرین شرٹس کی ٹی 20 فتوحات کا تناسب 65.79 رہا، ڈیو واٹمور اور محسن خان کی کوچنگ میں پاکستان ٹیم نے 60کے تناسب سے فتوحات پائیں۔ معین خان کی کوچنگ میں ٹیم نے 50کے تناسب سے کامیابیاں سمیٹیں۔ مصباح الحق کے دور میں فتوحات کا تناسب 47.06رہا، وقار یونس کے دور میں جیت کا تناسب 39.53رہا، عبدالرحمان اور گرانٹ بریڈبرن کی کوچنگ میں ٹیم نے 33.33کے تناسب سے فتوحات سمیٹیں۔ محمد حفیظ کی کوچنگ میں ٹیم کی فتح کا تناسب 20رہا۔