سڈنی (نوائے وقت رپورٹ+ این این آئی) آسٹریلیا کے معروف شہر سڈنی میں چاقو بردار شخص کے لوگوں پر حملے میں سات افراد ہلاک ہوگئے۔ حملہ آور پولیس کی فائرنگ سے مارا گیا۔ آسٹریلین میڈیا کے مطابق واقعہ سڈنی کے ایک شاپنگ مال میں پیش آیا۔ واقعے کی ویڈیوز بھی منظر عام پر آ گئیں۔ ویڈیوز میں دیکھا جا سکتا ہے کہ حملہ آور نے لوگوں پر چاقو کے وار کیے، متعدد لوگوں کو زخمی کیا جن میں سے سات افراد جان کی بازی ہار گئے۔ لوگوں میں ہلچل مچنے پر ایک پولیس اہلکار نے حملہ آور پر فائرنگ کر دی اور وہ موقع پر ہی مارا گیا۔ پولیس کے مطابق حملہ آور کی شناخت کا عمل اور حملے کی وجوہات کا تعین کیا جا رہا ہے۔ واقع میں آٹھ ماہ کے بچے اور اس کی ماں سمیت آٹھ افراد زخمی ہوئے۔ جنہیں ہسپتال منتقل کر دیا گیا ہے۔ کئی لوگوں کی حالت تشویشناک ہے جبکہ سات افراد ہلاک ہو گئے ہیں۔