فیروزوالہ( نامہ نگار) لاہور  شیخوپورہ روڈ پر قلعہ ستار شاہ کے قریب مبینہ پولیس مقابلہ میں پولیس نے زخمی ڈاکو کو ساتھی سمیت گرفتار کر لیا جبکہ ایک ڈاکو فرار ہو گیا، ڈاکووں کے ہاتھوں لٹنے والی متاثرہ فیملی نے پٹرولنگ پولیس خان پور کو واردات کے بارے میںآگاہ کیا۔ پولیس ٹیم نے قلعہ ستار شاہ کے قریب ناکہ بندی کر لی ‘ موٹر سائیکل پر سوار مشکوک تین افراد کو دیکھ کر روکنے کی کوشش کی ‘موٹر سائیکل سواروں نے مبینہ طور پر پولیس پر سیدھی فائرنگ کر دی۔ جوابی فائرنگ کی گئی‘ فائرنگ رکنے پر ایک ڈاکو اپنے ساتھیوں کی فائرنگ سے زخمی حالت میں پکڑا گیا ‘جس کی شناخت الیاس کے نام سے ہوئی۔ پولیس نے مفرور ڈاکوئوں کاتعاقب کر کے ایک مفرور ڈاکو الیاس کو بھی حراست میں لے لیا جبکہ تیسرا ساتھی صابرکھرل فرار ہو گیا۔ فیکٹری ایریا پولیس نے مقدمہ درج کر لیا۔ گرفتار ملزمان ڈکیتی اور دیگر مقدمات میں ریکارڈ یافتہ بتائے گئے ہیں مفرور ڈاکو کی تلاش جاری ہے پولیس نے پکڑے جانے والے ملزمان کے قبضہ سے لوٹا ہوا مال برآمد کر لیا پولیس کے مطابق  ملزموں کے قبضے سے برامد ہونے والی موٹرسائیکل بھی ڈکیتی میں چھینی گئی نکلی جو انہوں نے چند روز قبل تھانہ فیکٹری ایریا کے علاقہ سے چھینی تھی۔