لاہور+ فیروزوالا (نامہ نگار) ڈاکوؤں اور چوروں نے شہریوں سے لاکھوں روپے مالیت کی نقدی، طلائی زیورات، موبائلگ فون،موٹر سائیکلیں،گاڑیاں اور دیگر سامان لوٹ لیا ہے۔ تفصیلات کے مطابق ڈاکوؤں نے اچھرہ علاقے میں تصور کے گھر گھس کر اہلخانہ کو یرغمال بنا کر5لاکھ روپے مالیت کی نقدی، طلائی زیورات، موبائل فون اور دیگر سامان، برکی کے علاقے میں نوازسے 3 لاکھ 40 ہزار روپے اور موبائل فون، غازی آباد میں احد سے 3 لاکھ نقدی اور موبائل فون، سمن آباد میں طاہر سے 2 لاکھ 40 ہزار روپے اور موبائل فون، فیکٹری ایریا میں نبیل سے 2 لاکھ روپے ،مناواں کے علاقے میں مصدق سے 75ہزار روپے اور موبائل فون، مصطفی آباد کے علاقے میں زاہد سے 55ہزار روپے اور موبائل فون، ٹاؤن شپ کے علاقے میں تبسم سے 70ہزار روپے اور موبائل فون،اسلام پورہ کے علاقے میں نوید سے 20ہزار روپے اور موبائل فون، چوہنگ کے علاقے میں کامران سے 10ہزار روپے اور موبائل فون لوٹ لیا اور فرار ہوگئے۔ چوروں نے کاہنہ کے علاقے میں راشدکے گھر کے تالے توڑ کر 5 لاکھ 10ہزار روپے مالیت کے طلائی زیورات اور نقدی چوری کر لی ہے۔ چوروں نے فیصل ٹاؤن، ہنجروال، غالب مارکیٹ اور برکی کے علاقوں میں سے 4 کاریں، مزنگ کے علاقے میں سے رکشہ جبکہ لوئرمال، شفیق آباد، مصری شاہ، باغبانپورہ، شاہدرہ، بھاٹی گیٹ، نولکھا، مصطفی ٹاؤن، نصیر آباد، راوی روڈ اور شیراکوٹ کے علاقوں میں سے 11 موٹر سائیکلیں چوری کر لیں۔ دریں اثناء شیخوپورہ، لاہور روڈ کی آبادی منڈیالی کا لقمان بھٹی کے ساتھ موٹر سائیکل پر جارہا تھا کہ ڈاکوؤں نے لوٹنے کے بعد فائرنگ کر دی جس سے لقمان اور اس کا ساتھی اور راہگیر خاتون عادیہ بی بی زخمی ہو گئے۔ ڈاکوؤں نے منڈی مویشیاں آنے والے بیوپاریوں کو لوٹ لیا۔ ڈاکو لاکھوں روپے کی نقدی، زیورات، موبائلز اور قیمتی گاڑیاں چھین کر لے گئے۔