لاہور(سپورٹس رپورٹر)ویسٹ انڈیز ویمنز نے پاکستان  ویمنز کو88 رنز سے شکست دیکر3ون ڈے میچوں کی سیریز میں کلین سویپ کردیا۔کراچی میں ویسٹ انڈیز ویمنز نے ٹاس جیت کر 6 وکٹوں پر 278 رنز بنائے۔ کپتان ہیلی میتھیوز نے سیریز میں دوسری سنچری بنائی‘ 141 رنز بناکر آؤٹ ہوئیں۔سٹیفنی ٹیلر نے 47 رنز بنائے۔ہیلی اور سٹیفنی نے تیسری وکٹ کی شراکت میں 111 رنز بنائے۔ نشرہ سندھو نے 3 ،فاطمہ ثنا نے 2  وکٹیں لیں۔ویسٹ انڈیز کے 279 رنز کے ہدف کے تعاقب میں پاکستان ویمنز کی بیٹنگ لائن بری طرح ناکام ہوئی ‘ٹیم 48 ویں اوور میں 190 رنز پر آؤٹ ہوگئی، منیبہ علی 38 اور عالیہ ریاض 36 رنز بناکر نمایاں رہیں۔فاطمہ ثنا اور طوبی حسن نے 23 ،23 رنز بنائے جبکہ کپتان ندا ڈار ، سدرا امین اور ناجیہہ علوی 9 ،9 رنز بناسکیں۔ہیلی میتھیوز ‘سٹیفنی ٹیلر اورایلیاہ ایلینے نے دو دوکھلاڑیوں کو آئوٹ کیا ۔ ہیلی میتھیوز کو میچ اور سیریز کی بہترین کھلاڑی قرار دیا گیا۔