واشنگٹن(این این آئی)امریکہ کے صدر جوبائیڈن کی غزہ سے متعلق پالیسی پر احتجاجا امریکی محکمہ خارجہ کی خاتون ترجمان مستعفی ہوگئیں۔غیرملکی میڈیا کے مطابق عربی زبان کی ترجمان ہالا رہررِٹ دبئی ریجنل میڈیا ہب کی ڈپٹی ڈائریکٹر بھی تھیں اور وہ 2006 میں امریکی محکمہ خارجہ میں بطور پولیٹیکل افسر شامل ہوئی تھیں۔رپورٹس کے مطابق غزہ کے معاملے پر امریکی محکمہ خارجہ میں یہ تیسرا استعفی ہے۔سوشل میڈیا پر خاتون ترجمان نے اپنے استعفے سے متعلق لکھا کہ امریکہ کی غزہ پالیسی کی مخالفت میں 18 سال کی خدمات کے بعد اپریل 2024 میں استعفی دیا۔ہالا رہررِٹ نے اپنے پیغام میں لکھا کہ اسلحہ نہیں ڈپلومیسی اختیار کریں اور امن اور اتحاد کے لیے طاقت بنیں۔واضح رہے کہ 7 اکتوبر سے جاری اسرائیلی حملوں میں 34 ہزار سے زائد فلسطینی شہید ہوچکے ہیں۔