لاہور(سپورٹس رپورٹر)پاکستان کرکٹ ٹیم کے سابق کپتان اور ٹیم ڈائریکٹر محمد حفیظ نے کہاہے کہ بھارتی بیٹر ویرات کوہلی اور قومی ٹیم کے کپتان بابر اعظم کے درمیان کوئی موازنہ نہیں ہے۔ محمدعامر، عماد وسیم، عثمان خان اچھے کھلاڑی ہیں لیکن سلیکشن کا ایک طریقہ کار ہوتاہے،تینوں کھلاڑی پہلے ڈومیسٹک کرکٹ کھیلتے جس کی پرفارمنس پر قومی ٹیم میں منتخب کیاجاتا،اگر پیرا شوٹ سے سلیکشن ہو گی تو ڈومیسٹک کرکٹرز کو غلط پیغام دیا جائیگا۔ میں نے لیول ون کوچنگ کورس کیاہواہے،کوچنگ کورس تعلیم ہے،ضرور کرنا چاہیے لیکن کوچنگ کورس ہی سب کچھ نہیں، اگر کوچنگ کورس پر چلنا ہے تو سب سے زیادہ مارکس والے کو قومی ٹیم کا کوچ لگادیں،کوچنگ میں انٹرنیشنل کرکٹ کا تجربہ نظر انداز نہیں کیا جاسکتا، مجھے ڈائریکٹر ٹیم کے عہدے سے ہٹانے کا طریقہ کار افسوس ناک تھا، سابق پی سی بی چیئرمین نے بیان دیاکہ پاکستانی کوچنگ سٹاف ایماندار نہیں، ایسے بیان سے ہزاروں لوکل کوچز کو تکلیف پہنچی،پاکستان میں لیجنڈز موجود ہیں جن کو دنیا مانتی ہے،پی سی بی میں لوگ غلامانہ سوچ کے مالک ہیں جو سمجھتے کہ غیرملکی کوچ ہی ہونا چاہیے،میں نے کبھی کسی لوکل کوچ کو سفارش مانتے نہیں دیکھا،ایسا تاثر غلط ہے۔