وزیرآباد (نامہ نگار) وزیرآباد مبینہ پولیس مقابلہ میں  زیر حراست ملزم مال مسروقہ کی برآمدگی کے لیے لے جاتے ہوئے اپنے ساتھیوں کی فائرنگ سے ہلاک ہو گیا۔ وزیرآباد کے علاقہ کوٹ شاہ محمد میں پولیس تھانہ سوہدرہ کے زیر حراست گکھڑ کے علاقہ محلہ شاہ سلیمان کا رہائشی یاسر بٹ جو کہ ڈکیتی کے مقدمہ میں گرفتار تھا اور پولیس مال مسروقہ کی برآمدگی کے لیے لے جا رہی تھی کہ ملزم کے ساتھیوں نے پولیس پارٹی پر فائرنگ کر دی۔ ابتدائی طبی امداد کے بعد ڈسٹرکٹ ہیڈ کوارٹر ہسپتال گوجرانوالہ منتقل کیا گیا، ملزم دوران علاج خون بہہ جانے کی وجہ سے چل بسا۔ ذرائع سے معلوم ہوا ہے کہ ملزم یاسر بٹ کو پولیس تھانہ سوہدرہ نے ونجووالی کے قریب روڈ پر ڈکیتی کرتے ہوئے گرفتار کیا تھا۔ دوسری جانب مقتول ملزم یاسر بٹ کے اہلخانہ کا موقف ہے کہ ان کے بیٹے کو پولیس نے  بے گناہ قتل کیا، ملزم یاسر بٹ کا ماضی میں کوئی کریمنل ریکارڈ نہ ہے اور پولیس نے یاسر بٹ کو جعلی مقابلہ میں قتل کیا ہے۔ پولیس نے مذکور پولیس مقابلہ کی بابت تھانہ سوہدرہ میں مقدمہ نمبر 188/24درج کر لیا ہے۔ ملزم ہلاک