بھارتی وزیردفاع میں ہمت ہے تو آگے بڑھیں ، پاکستان نت چوڑ یاں ، نہیں پہن رکھیں فاروق عبداـ
سری نگر (نوائے وقت رپورٹ) جموں و کشمیر نیشنل کانفرنس کے رہنما اور سابق وزیراعلیٰ مقبوضہ کشمیر فاروق عبد اللہ نے بھارتی وزیر دفاع راج ناتھ سنگھ کے متنازعہ بیان کے جواب میں کہا ہے کہ پاکستان نے چوڑیاں نہیں پہن رکھیں۔ بھارتی وزیر دفاع راج ناتھ سنگھ نے اپنے ایک متنازعہ بیان میں کہا تھا کہ بھارت کی ترقی کو دیکھتے ہوئے آزاد کشمیر والے خود ہی پاکستان کے بجائے بھارت کے ساتھ شامل ہونے کا مطالبہ کریں گے۔ ہم انہیں بھارت میں ضم کرلیں گے۔ جس پر مقبوضہ جموں و کشمیر کے متعدد بار وزیراعلیٰ رہنے والے فاروق عبداللہ نے کہا ہے کہ آزاد کشمیر کو اپنے ساتھ ضم کرنے کی بات کرنے والے بھارتی وزیر، اگر ہمت رکھتے ہیں تو آگے بڑھیں اور اپنا دعویٰ مکمل کرکے دکھائیں۔ فاروق عبداللہ نے کہا کہ ایسا کرنے سے پہلے انہیں سوچ لینا چاہیے کہ پاکستان نے بھی چوڑیاں نہیں پہن رکھیں، اس کے پاس ایٹم بم ہیں اور بدقسمتی سے وہ ہم پر گریں گے۔ قبل ازیں وزیر خارجہ ایس جے شنکر نے اتوار کو کہا تھا کہ پاکستان کا آزاد کشمیر دراصل بھارت کا حصہ ہے اور بھارتی پارلیمنٹ کی اس حوالے سے ایک قرارداد بھی موجود ہے۔ بھارتی وزراء کے ان پے در پے متنازع بیانات کا مقصد حالیہ انتخابات میں ہندو ووٹرز کو اکسا کر بھارتیہ جنتا پارٹی کو ایک بار پھر کامیاب بنانا ہے کیوں کہ کارکردگی کے نام پر ووٹ لینے کے لیے مودی سرکار کے پاس کچھ نہیں۔
