شیخوپورہ (نمائندہ خصوصی) تحریک انصاف نظریاتی کے چیئر مین اختر اقبال ڈار نے پاکستانی نژاد صادق خان کو تیسری مرتبہ لندن کا میئر منتخب ہونے پر مبارکباد دیتے ہوئے کہا ہے کہ ان کی کامیابی محنت عوامی خدمت،سچ کی جیت ہے اور یہ جیت بیرون ممالک میں مسلمانوں،پاکستانیوں کیلئے مشعل راہ ہے جبکہ ماضی میں ریاست مدینہ کے نام نہاد داعی عمران خان کیلئے پیغام ندامت ہے جو ماضی میں اپنے غیر مسلم برادر نسبتی زیک گولڈ سمتھ کی الیکشن کمپیئن کرتا رہا اور صادق خان کی مخالفت میں زہر افشانی اور قصیدے پڑھتا رہا انہوں نے کہاکہ صادق خان نے پہلے الیکشن میں ہی عمران خان کے سالے کو عبرت ناک شکست دی تھی اختر ڈار نے کہاکہ اپنی بیٹی ٹریان کو تسلیم نہ کرنے والا اپنے بچوں کو غیرمسلموں کے سپرد کرنے والا پاکستان میں اسلامی ٹچ دیتے ہوئے اسلام کا نام نہاد سفیر بنا ہوا ہے۔