پاکستانیوں کے دِل پر 9 مئی کو لگنے والا زخم آج بھی تازہ ہے ‘ مریم اورنگزیب
لاہور( این این آئی)پاکستان مسلم لیگ (ن) کی مرکزی ترجمان و سینئر صوبائی وزیر مریم اورنگزیب نے 9 مئی کے سانحہ کی مذمت کرتے ہوئے شہداء کے ورثاء سے سے اظہار یکجہتی کیا ہے -اپنے بیان میں انہوں نے کہا کہ انتہا پسندی، ملک دشمنی اور نفرت کی سوچ نے 9 مئی کی ناپاک سازش کی -انہو ں نے کہا کہ محب وطن پاکستانیوں کے دِل پر 9 مئی کو لگنے والا زخم آج بھی تازہ ہے اور محب وطن پاکستانی، شہداء کے اہل خانہ کے دلوں پر 9 مئی کو لگنے والا زخم کبھی نہیں مٹے گا -دفاع کے اداروں، شہداء کی یادگاریں تقدس اور احترام کی علامت ہیں جن پر حملے کرکے دشمن کا ایجنڈا پورا کیاگیا -جن شہداء کی بہادری اور وطن سے وفا کی گواہی دشمن نے دی، ان کی یادگاروں پر حملے کرنے والے پاکستانی کہلانے کے حق دار نہیں -انہوں نے کہا کہ 9 مئی کو مساجد، ایمبولینسز، سکولوں، نجی عمارتوں، ریڈیو پاکستان اور جناح ہاؤس سمیت کسی قومی اثاثے کا لحاظ نہ کیاگیا، یہ نفرت اور گمراہی کی انتہاتھی -انہوں نے کہا کہ پوری قوم، اداروں، میڈیا، سول سوسائٹی، دانشوروں، نوجوانوں سمیت سب کو مل کر اس منفی سوچ سے چھٹکارا پانا ہوگاتا کہ پاکستان ترقی کر سکے۔
