لاہور(سپورٹس رپورٹر)آئندہ سال 2025 ء میں پاکستان میں شیڈول آئی سی سی چیمپئینز ٹرافی کے فارمیٹ میں تبدیلی پر غور شروع کردیا گیا۔ براڈکاسٹرز سمیت سٹیک ہولڈرز کے درمیان ہونیوالے اجلاس میں چیمپئنز ٹرافی 2025 ء کے مستقبل کے حوالے سے اہم بات چیت ہوئی۔ تجویز دی گئی کہ چیمپئنز ٹرافی کے ایونٹ کو 50 اوورز کے بجائے ٹی20 فارمیٹ پر کروایا جائے، اعداد و شمار پیش کیے گئے ، ورلڈکپ 2019 ء کے بعد سے 50 اوورز فارمیٹ میں شائقین کی 20 فیصد کمی دیکھی گئی ہے۔براڈ کاسٹرز اشتہار کے باعث ون ڈے فارمیٹ کو ترجیح دیتے ہیں تاہم سلاٹس کے فروخت ہونے کا امکان کم ہوتا ہے۔پاکستان میں آنیوالی چیمپئنز ٹرافی اگلے برس فروری اور مارچ کے وسط میں ہونے کا امکان ہے جبکہ منتظمین کیلئے بڑا چیلنج 8 ٹیموں کی چیمپئنز ٹرافی کیلئے مختص کردہ 17-18 دن کی ونڈو تلاش کرنا ہے۔آئی سی سی نے ون ڈے فارمٹ کے طور پر ایونٹ کے حقوق فروخت کر دیئے ہیں،تبدیلی کیلئے سٹیک ہولڈرز کیساتھ بات چیت کرنا ہوگی۔آئی سی سی کے اعلیٰ حکام ون ڈے فارمیٹ پر ہی بضد ہیں۔