اسلام آ باد (آئی این پی ) خیبرپی کے اور اسلام آباد میں شدید گرمی کے پیش نظر سرکاری سکولوں کے اوقات کار تبدیل کردیئے گئے۔ محکمہ تعلیم خیبرپی کے  کے مطابق صوبہ بھر میں اسکول صبح8 بجے کے بجائے7بجے کھلیں گے، پرائمری سکیشن کی چھٹی 11 بجے جبکہ مڈل، ہائی اور ہائیرسکینڈری سکولوں کی چھٹی12 بجے ہوگی۔ اعلامیے کے مطابق پرائمری سکولوں کی گرمی کی چھٹیاں یکم جون سے31اگست تک ہوں گی، مڈل، ہائی اور ہائیرسکینڈری سکولوں کی چھٹیاں15جون سے31اگست تک ہوں گی۔ محکمہ تعلیم کے مطابق سرمائی علاقوں کے سکولوں میں یکم جولائی سے31اگست تک چھٹیاں ہوں گی۔ اعلامیے کے مطابق سکولوں کے اوقات کارشدید گرمی کے باعث تبدیل کیے گئے۔ دوسری جانب وفاقی وزارت تعلیم نے اسلام آباد کے سکول اوقات میں مزید کمی کر دی۔ سیکرٹری تعلیم محی الدین وانی کا کہنا ہے کہ کل سے سکول صبح ساڑھے 7 سے ساڑھے 11 تک کھلیں گے۔ اس سے قبل اوقات کار صبح ساڑھے 7 سے دوپہر ایک بجے تک کئے گئے تھے۔