لاہور(نامہ نگار)شہر میں ڈاکوؤں اور چوروں نے ڈکیتی اور چوری کی وارداتوں کے دوران متعدد شہریوں سے لاکھوں روپے کی نقدی،طلائی زیورات،موبائل فون، موٹر سائیکلیں، گاڑیاں اور دیگر سامان لوٹ لیا ہے۔ ڈاکوؤں نے ٹاؤن شپ میں عدنان کی فیملی سے 5 لاکھ‘زیورات ‘ موبائل فون،شادمان میں زاہد کی فیملی سے 4 لاکھ ‘زیورات ‘ موبائل فون،مغلپورہ میں قاسم کی فیملی سے ساڑھے تین لاکھ ‘ نقدی،زیورات اور موبائل فون،کاہنہ میں شاہد سے اڑھائی لاکھ‘ موبائل فون،مناواں میں مظہر سے ڈیڑھ لاکھ ‘ موبائل فون،قلعہ گجر سنگھ میں نصیر سے ایک لاکھ نقدی اور موبائل فون۔مسلم ٹائون میں امتیاز سے 50 ہزار اور موبائل فون،اچھرہ میں وارث سے30 ہزار‘ موبائل فون،مصطفی آباد میں حماد سے 15ہزار‘موبائل فون لوٹ لیا۔چوروں نے باٹا پور،ڈیفنس اور گلبرگ سے تین سے گاڑیاں جبکہ فیصل ٹاؤن، ملت پارک، ریس کورس، شفیق آباد،وحدت کالونی،نصیر آباد، ساندہ ور اور ٹاؤن شپ سے آٹھ موٹر سائیکلیں چوری کر لی ہیں۔ مختلف علاقوں میں پولیس مقابلوں کے بعد 4 ڈاکوؤں کو زخمی حالت میں گرفتار کر لیا گیا۔ رنگ روڈ پر موٹروے موریاں محمود بوٹی کے قریب باغبانپورہ پولیس نے دو موٹر سایکل سوار افراد کو مشکوک جانتے ہوئے روکنے کا اشارہ کیا۔ پولیس کو دیکھتے ہی انہوں نے پولیس پر فائرنگ کرنا شروع کر دی۔ جوابی کاررائی میں ایک زخمی حالت میں پکڑا گیا۔ بادامی باغ پولیس نے واردات کرنے والے 3موٹر سواروں کو روکنے کی کوشش کی۔ڈاکوؤں نے پولیس کو دیکھتے ہی فائرنگ  کرنا شروع کر دی،ملزمان کی فائرنگ سے ن کے اپنے ہی دو ساتھی رمضان اور شاہ رخ زخمی ہوگئے۔جنہیں زخمی حالت میں گرفتار کر لیا گیا۔موٹر سائیکل سوار ڈاکوؤں نے پولیس پر اندھا دھند فائرنگ کر دی،ایک ڈاکو بلال اپنے ساتھی کی فائرنگ سے زخمی ہو گیا۔جسے گرفتار کر لیا گیا۔