کراچی (نیٹ نیوز) جمشید کوارٹر میں صبح سویرے فائرنگ کے واقعہ میں دو سگے بھائی جاں بحق ہوگئے۔ ایس پی جمشید کوارٹر علینہ راجپر کے مطابق موٹر سائیکلوں پر سوار ملزموں  نے گرو مندر چوک کے قریب سیاہ رنگ کی کار کو نشانہ بنایا۔ ملزموں نے دو طرف سے کار پر اندھا دھند فائرنگ کی جس کے نتیجے میں کار میں سوار دو بھائی واجد اورنگزیب اور شان اورنگزیب شدید زخمی ہوئے، زخمیوں کو فوری طور پر ہسپتال منتقل کیا گیا تاہم وہاں پہنچنے تک دونوں بھائی جانبر نہ ہوسکے۔ علینہ راجپر نے بتایا کہ کار میں 5 بھائی سوار تھے جن میں سے 2 بھائی شدید زخمی ہوئے اور ایک بال بال بچ گیا۔ واقعہ دشمنی کا نتیجہ ہے، جائے وقوعہ سے نائن ایم ایم پستول کے 18 خول ملے ہیں جب کہ کار پر بھی لگ بھگ اتنی ہی گولیوں کے نشانات پائے گئے ہیں۔ پولیس کے مطابق مقتولین لسبیلہ چوک کے قریب کے رہائشی تھے جو پیشی کے لیے سٹی کورٹ جارہے تھے۔