لاہور(سپورٹس رپورٹر)چیئرمین پاکستان کرکٹ بورڈ محسن نقوی نے  انگلینڈ و ویلز کرکٹ بورڈ کے چیئرمین رچرڈ تھامسن اور چیف ایگزیکٹو آفیسر رچرڈ گولڈ سے ملاقات کی۔ ملاقات میں حالیہ پاکستان انگلینڈ ٹی ٹونٹی کرکٹ سیریز اور آئندہ ہونے والی کرکٹ سیریز پر تبادلہ خیال کیا گیا۔اکتوبر میں پاکستان میں پاک انگلینڈ ٹیسٹ کرکٹ سیریز پر بھی بات چیت ہوئی۔ محسن نقوی نے چیئرمین انگلینڈ و ویلز کرکٹ بورڈ رچرڈ تھامسن کو پاک انگلینڈ سیریز پر پاکستان کے دورہ کی دعوت دی۔محسن نقوی نے انگلینڈ میں ٹی ٹونٹی کرکٹ سیریز کے دوران بہترین انتظامات پر چیئرمین انگلینڈ و ویلز کرکٹ بورڈ کا شکریہ ادا کیا۔ ملاقات میں ٹی ٹونٹی ورلڈ کپ کی تیاریوں کے حوالے سے گفتگو بھی کی اور دونوں چیئرمینز نے ٹی ٹونٹی ورلڈ کپ کیلئے ایک دوسرے کیلئے نیک خواہشات کا اظہار بھی کیا۔ محسن نقوی نے آئندہ برس پاکستان میں چیمپئنز ٹرافی کے انعقاد کے انتظامات کے بارے آگاہ کیا۔ محسن نقوی نے بتایا کہ چیمپئنز ٹرافی کرکٹ ٹورنامنٹ کیلئے سٹیڈیمز کی اپ گریڈیشن کے کام کا آغاز کر دیا ہے اور پاکستان میں کرکٹ ٹیموں کیلئے ہر لحاظ سے فول پروف انتظامات کئے جائیں گے۔ کرکٹ کھیل کیساتھ دلوں کوبھی جوڑتا ہے۔ چیئرمین انگلینڈ و ویلز کرکٹ بورڈ نے چیمپئنز ٹرافی کے حوالے سے پی سی بی کیلئے نیک تمناؤں کا اظہار کیا۔چیف آپریٹنگ آفیسر پی سی بی سلمان نصیر بھی اس موقع پر موجود تھے۔