لاہور(سپورٹس رپورٹر)پاکستان فرانس سے شکست کے باوجود نیشنز ہاکی کپ کے سیمی فائنل میںپہنچ گیا ۔ پولینڈ کے شہر گونیزنو میں کھیلے جارہے ٹورنامنٹ میں پاکستان اور فرانس کے درمیان میچ سنسنی خیز رہا ۔ فاتح ٹیم نے پانچ کے مقابلے میں چھ گول سے فتح سمیٹی ۔ فرانس کے شارلٹ نے چار‘روگیو اور بائوم گارٹن نے ایک ایک گول کیا۔ پاکستان کی جانب سے محمود ‘یعقوب ‘رانا ‘رحمان اور شاہد نے ایک ایک گول کیا ۔ ایک اور میچ میں ملائیشیا نے کینیڈا کو چار دو گول سے ہرا دیا ۔ پول بی میں فرانس نو پوائنٹس کیساتھ سر فہرست رہا اور سیمی فائنل میں پہنچ گیا۔ پاکستان اور ملائیشیا کے چار چار پوائنٹس تھے ۔ بہترین گول اوسط کی وجہ سے پاکستان ٹیم سیمی فائنل کیلئے کوالیفائی کرگئی ۔ پول اے میں نیوزی لینڈ کی ٹیم بارہ پوائنٹس کیساتھ سیمی فائنل میںپہنچ چکی ہے ۔چوتھی سیمی فائنلسٹ ٹیم کا فیصلہ آج کے میچوں کے بعد ہوگا۔ پاکستان کا سیمی فائنل 8جون کو نیوزی لینڈ سے ہوگا۔