لاہور (نامہ نگار) ڈاکوؤں اور چوروں نے متعدد شہریوں سے لاکھوں روپے مالیت کی نقدی، طلائی زیورات، موبائل فون، موٹر سائیکلیں، گاڑیاں اور دیگر سامان لوٹ لیا۔ تفصیلات کے مطابق ڈاکوؤں نے ماڈل ٹاؤن کے علاقے میں وقار کے گھر میں گھس کر اہلخانہ کو یرغمال بنا کر سے 5 لاکھ 10 ہزار روپے مالیت کی نقدی، طلائی زیورات، موبائل فون اور دیگر سامان، مانگا منڈی کے علاقے میں عمر اور اس کی فیملی سے 4 لاکھ روپے مالیت کی نقدی و طلائی زیورات، بادامی باغ کے علاقے میں ادریس اور اس کی فیملی سے ڈھائی لاکھ روپے مالیت کی نقدی، زیورات اور موبائل فون، مسلم ٹاؤن میں عمر سے ایک لاکھ 60 ہزار روپے اور موبائل فون، نشتر کالونی میں ارشد سے ایک لاکھ روپے اور موبائل فون، لاری اڈا میں خضر سے 65 ہزار روپے اور موبائل فون، شیراکوٹ میں ناظم سے 58 ہزار روپے اور موبائل فون، گارڈن ٹاؤن میں نصیر سے 46ہزار روپے اور موبائل فون لوٹ لیا اور فرار ہوگئے ہیں۔ چوروں نے ڈیفنس، مانگا منڈی، گڑھی شاہو اور غازی آباد کے علاقوں میں سے 4کاریں جبکہ نیو انارکلی، رنگ محل، مزنگ، لوئر مال، ٹائون شپ اور مناواں کے علاقوں میں سے6 موٹر سائیکلیں چوری کر لی گئیں۔