لاہور(سپورٹس رپورٹر)پاکستان نے چین کے شہر ڈالیان میں ہونے والی ایشین ٹیم سکواش چیمپئن شپ کے سیمی فائنل کیلئے کوالیفائی کرنے کیلئے بھارت کو 2-1 سے شکست دیدی۔ عاصم خان نے بھارت کے راہول بیتھا کیخلاف 3-0 سے فتح کے ساتھ پاکستان کو مقابلے میں برتری دلائی۔ تاہم بھارت کے ویلاوان سینتھل کمار نے ناصر اقبال کیخلاف 3-0 سے جیت کیساتھ اپنی ٹیم کو میچ میں واپسی کی مدد دی۔ پاکستان کے کوچ فہیم گل نے میچ کے بعد تصدیق کی کہ اقبال بخار میں مبتلا ہیں جس کی وجہ سے وہ اپنے میچ میں اچھی کارکردگی کا مظاہرہ نہیں کر سکے۔ میچ 1-1 پر ہونے کیساتھ ہی پاکستان کے نور زمان نے کارکردگی پیش کرتے ہوئے سورج کمار چند کو 3-0 سے ہرا کر اپنی ٹیم کو اگلے راؤنڈ میں جانے میں مدد کی۔پاکستان کا مقابلہ آج ہانگ کانگ سے ہوگا جس نے ایران کو شکست دی تھی۔پاکستان ایشین مینز ٹیم سکواش چیمپئن شپ کی تاریخ میں 15 گولڈ میڈلز کیساتھ سب سے کامیاب ٹیم ہے۔ تاہم ایونٹ میں ان کی آخری کامیابی 2016ء میں آئی تھی۔ بھارت 2022ء  میں جنوبی کوریا میں ٹائٹل جیتنے کے بعد مردوں کا دفاعی چیمپئن ہے۔