اسلام آباد (اپنے سٹاف رپورٹر سے) نائب وزیراعظم محمد اسحاق ڈار نے کہا ہے کہ طبی تعلیم کے معیار کو بلند کرنا ہمارے شہریوں کی صحت اور بہبود کے لیے بہت ضروری ہے۔ حکومت صحت کی دیکھ بھال کرنے والے پیشہ ور افراد کی اگلی نسل کی مدد کرنے اور انہیں بہترین ممکنہ تعلیم اور تربیت حاصل کرنے کو یقینی بنانے کے لیے پرعزم ہے۔ نائب وزیر اعظم کے دفتر سے جاری بیان کے مطابق ان خیالات کا اظہار انہوں نے گزشتہ روز میڈیکل ایجوکیشن پر دوسرے اجلاس کی صدارت کرتے ہوئے کیا۔ اپنے افتتاحی خطاب میں نائب وزیراعظم  اسحاق ڈار نے ملک کے صحت کی دیکھ بھال کے چیلنجوں سے نمٹنے میں مضبوط طبی تعلیم کے ضروری کردار پر روشنی ڈالی اور کہا ہمارے اداروں کو اپنے مستقبل کے طبی پیشہ ور افراد کو اعلیٰ درجے کی تعلیم اور تربیت فراہم کرنے کے لیے بااختیار بنانا چاہیے۔ طبی طالب علموں کو صحت کی دیکھ بھال کے شعبے میں بہترین کردار ادا کرنے کے لیے سازگار ماحول کی پرورش کی اہمیت پر زور دیا۔ کوآرڈینیٹر وزیراعظم برائے صحت نے اجلاس میں ذیلی کمیٹی کی سفارشات پیش کیں۔ اجلاس میں  پاکستان میں طبی تعلیم کے معیار کو بہتر بنانے پر توجہ مرکوز کی گئی۔ ذیلی کمیٹی کی پیش کردہ تجاویز میں تعلیم کو بین الاقوامی بہترین طریقوں کے برابر لانا، غیر ملکی میڈیکل کالجوں میں داخلوں کو سہل بنانے کے اقدامات، یکسانیت کو یقینی بنانے کے لیے سرکاری اور نجی شعبے اور ریگولیٹری اداروں کے درمیان ہم آہنگی کو بہتر بنانا اور دیگر تجاویز شامل ہیں۔