شیخوپورہ+ فاروق آباد+ اسلام آباد (نمائندگان خصوصی) تھانہ صدر فاروق آباد کے علاقہ ککڑ گل کے قریب پولیس مقابلہ کے دوران دو ڈاکو ہلاک جبکہ دو فرار ہو گئے۔ تفصیلات کے مطابق ڈاکوؤں نے گزشتہ رات دوران واردات ایلیٹ فورس کے ملازم کو بھی فائرنگ کر کے زخمی کیا تھا۔ گزشتہ روز ڈاکو ککڑ گل کے قریب لوٹ مار کر رہے تھے۔ پولیس پہنچی تو مقابلہ ہو گیا۔ ہلاک ہونے والے ڈاکو  ضلع شیخوپورہ سمیت دیگر اضلاع کی پولیس کو بھی مطلوب اور ریکارڈ یافتہ تھے۔ دریں اثنا تھانہ سیکرٹریٹ کے علاقے کشمیر چوک اسلام آ باد پولیس کا مبینہ بین الصوبائی کار لفٹر گینگ کے ساتھ مقابلہ ہو گیا۔ پولیس کے مطابق مقابلے میں کار لفٹر گینگ کے تین ملزمان اپنے ساتھیوں کی فائرنگ سے ہلاک ہو گئے۔ فائرنگ میں ایک عورت بھی زخمی ہوئی۔ نعشوں کی شناخت الیاس خان ساکن چار سدہ، وقاص خان ساکن چار سدہ ہوئی جبکہ ایک نعش کی شناخت کی جا رہی ہے۔