لاہور+ فیروزوالہ (نامہ نگار) ڈاکوؤں اور چوروں نے متعدد شہریوں سے لاکھوں روپے مالیت کی نقدی، طلائی زیورات، موبائل فون، موٹر سائیکلیں، گاڑیاں اور دیگر سامان لوٹ لیا ہے۔ جبکہ بیگم کوٹ میں پٹرول پمپ کیشیئر کو ڈاکوؤں نے قتل کر دیا۔ تفصیلات کے مطابق ڈاکوؤں نے گلشن راوی کے علاقے میں ساجد کے گھر گھس کر اہلخانہ کو یرغمال بنا کر 6لاکھ روپے مالیت کی نقدی، طلائی زیورات، موبائل فون اور دیگر سامان، شاہدرہ میں عبدالرحمٰن اور اس کی فیملی سے 3 لاکھ 90 ہزار روپے مالیت کی نقدی، زیورات اور موبائل فون، نشر کالونی میں صغیر سے ایک لاکھ 20 ہزار روپے اور موبائل فون، کوٹ لکھپت میں حفیظ سے گن پوائنٹ 60ہزار روپے اور موبائل فون، ملت پارک میں ڈاکو فیروز سے 31ہزار 5سو روپے، کاہنہ میں شہزاد سے35ہزار روپے اور موبائل فون، سندر میں شاہد اقبال سے26ہزار روپے اور موبائل فون سبزہ زار میں سلمان سے 12ہزار روپے اور موبائل فون، اچھرہ میں قاسم سے18 ہزاروپے اور موبائل فون لوٹ لیا۔ چوروں نے مناواں میں تنویرکے گھر سے 4 لاکھ روپے مالیت کی نقدی، زیورات اور دیگر سامان چوری کر لیا ہے۔ چوروں نے شاہدرہ، شالیمار اور لیاقت آباد میں سے 3گاڑیاں، مانگا منڈی میں سے رکشہ جبکہ راوی روڈ، مصطفی ٹاؤن، اسلام پورہ، مزنگ، شاہدرہ ٹاؤن، شفیق آباد ، مغلپورہ، مناواں اور شیراکوٹ میں 9موٹر سائیکلیں چوری کر لیں۔ دریں اثناء چوک بیگم کوٹ (میاں کالونی) کے قریب ڈاکوؤں نے پٹرول پمپ کے کیشیئر ملک علم دین کو گولی مار کر ہلاک کر دیا۔ علم دین میانوالی کا رہنے والا تھا۔