کراچی+ اسلام آباد (نوائے وقت رپورٹ+ اپنے سٹاف رپورٹر سے) چیف آف دی نیول سٹاف ایڈمرل نوید اشرف نے کہا ہے کہ مسلح افواج مادر وطن کی حفاظت کیلئے دہشت گردی سے نمٹنے کی بھرپور صلاحیت رکھتی ہیں۔ کراچی میں پاکستان نیول اکیڈمی میں 121 ویں مڈشپ مین کی پاسنگ آؤٹ پریڈ کی تقریب سے خطاب کرتے ہوئے نیول چیف ایڈمرل نوید اشرف نے کہا کہ ٹریننگ مکمل کرنے والے کیڈٹس اور ان کے والدین کو مبارکباد پیش کرتا ہوں، پاکستان نیول اکیڈمی معیاری تربیت فراہم کر رہی ہے۔ ان کا کہنا تھا کہ کیڈٹس جدید ٹرینڈز سے خود کو آراستہ کریں، امید ہے دوست ممالک کے کیڈٹس تعلقات کے فروغ کیلئے کردار ادا کریں گے۔ ایڈمرل نوید اشرف نے مزید کہا کہ پاکستان کو اندرونی اور بیرونی سکیورٹی چیلنجز کا سامنا ہے، مسلح افواج مادر وطن کی حفاظت کیلئے دہشت گردی سے نمٹنے کی بھرپور صلاحیت رکھتی ہیں، پاکستان نیوی سمندری حدود کی حفاظت کیلئے جدید ٹیکنالوجی سے لیس ہے۔ 
قبل ازیں پاکستان نیول اکیڈمی میں 121 ویں مڈشپ مین کی پاسنگ آؤٹ پریڈ کا انعقاد کیا گیا، تقریب میں چیف آف دی نیول سٹاف ایڈمرل نوید اشرف بطور مہمان خصوصی شریک ہوئے۔ پاسنگ آؤٹ پریڈ کے دوران 70 مڈشپ مین اور 28 ایس ایس سی کیڈٹ فارغ التحصیل ہوئے، پاکستان نیوی 29 ویں شارٹ سروس کمیشن کورس کے کیڈٹس بھی پاس آؤٹ ہوئے۔ تقریب کے دوران ایڈمرل نوید اشرف نے نمایاں کارکردگی کا مظاہرہ کرنے والوں میں انعامات تقسیم کئے، لیفٹیننٹ نوید احمد کو مجموعی کارکردگی پر قائد اعظم گولڈ میڈل دیا گیا، مڈشپ مین عبداللہ وحید نے اعزازی شمشیر، مڈشپ مین آفتاب احمد نے اکیڈمی ڈرک حاصل کی، آفیسر کیڈٹ محمد خبیب کو چیئرمین جوائنٹ چیفس آف سٹاف کمیٹی گولڈ میڈل دیا گیا۔ سری لنکا سے تعلق رکھنے والے آفیسر کیڈٹ تمیوتھینا کون کو چیف آف دی نیول سٹاف گولڈ میڈل دیا گیا، آفیسر کیڈٹ محمد دانش کو کمانڈنٹ گولڈ میڈل سے نوازا گیا۔
چیف آف نیول اسٹاف ایڈمرل نوید اشرف نے کہاہے کہ بحر ہند مستقبل کے تنازعات کے ممکنہ میدان کے طور پر ابھر رہا ہے۔آرٹیفیشل انٹیلیجنس والے پلیٹ فارمز اور دیگر ٹیکنالوجیز سکستھ جنریشن وار فیئر کا اشارہ دے رہے ہیں۔انہوں نے کہا کہ جیواسٹریٹجک اہمیت کے باعث بحر ہند مستقبل کے تنازعات کے ممکنہ میدان کے طور پر ابھر رہا ہے، اس صورتِ حال کے اثرات خطے اور اس سے آگے تک ہو سکتے ہیں۔نیول چیف آف اسٹاف نے کہا کہ میری ٹائم کے تحفظ اور صورت حال سے نمٹنے کے لیے پاک بحریہ جدید ٹیکنالوجی حاصل کر رہی ہے، پاکستان کی سمندری حدود کے تحفظ کے لیے ہنگور کلاس آبدوز کا حصول انتہائی اہم ہے۔نوید اشرف نے کہا کہ ہنگور کلاس آبدوز جدید اسٹیلتھ خصوصیات سے لیس ہے، ہنگور کلاس آبدوز کثیر الجہتی خطرات سے نمٹنے کی صلاحیت رکھتی ہے۔انہوںنے کہاکہ ہنگور کلاس آبدوز کی شمولیت خطے میں پاکستان نیوی کی صلاحیت بڑھائے گی، پاکستان نیوی علاقائی امن کے لیے دیگر ملکوں کی بحریہ کے ساتھ شراکت داری کر رہی ہے۔