کندھ کوٹ (آئی این پی+ نوائے وقت رپورٹ) ڈاکوؤں نے کچے کے علاقے میں قائم پولیس چیک پوسٹ ددڑ پر حملہ کردیا۔ ڈاکوؤں کی فائرنگ سے دو اہلکار شہید جبکہ ایک ڈاکو مارا گیا۔ بیس  سے زائد ڈاکوؤں نے پولیس چیک پوسٹ پر حملہ کیا۔ ڈاکوؤں کی فائرنگ سے دو اہلکار موقع پر شہید جبکہ دو زخمی ہوئے۔ ڈاکو فائرنگ کرتے ہوئے کچے کی طرف فرار ہو گئے۔ ایس ایس پی بشیر بروہی کا کہنا ہے کہ پولیس کی فائرنگ سے ایک ڈاکو بھی ہلاک ہو گیا جبکہ تین  ڈاکو بھی زخمی ہوئے ہیں۔ مارا جانے والا ڈاکو نظیر بھیو 6  دن قبل اغوا ہونے والے تین تاجروں کے اغوا میں ملوث تھا۔ اطلاع ملنے پر پولیس کی بھاری نفری جائے وقوعہ پر پہنچ گئی اور شہید اہلکاروں کی میتیں اور زخمیوں کو ہسپتال منتقل کر دیا۔ پولیس کے مطابق شہید اہلکاروں میں اللہ ڈنو سبزوئی، نثار احمد کلہوڑو جبکہ زخمی اہلکاروں میں زاہد نصیرانی اور انور چنہ شامل ہیں۔ پولیس کے مطابق ڈاکوؤں کی فائرنگ کے بعد علاقے میں بھاری نفری تعینات کر دی گئی اور سرچ آپریشن جاری ہے جبکہ علاقے میں نفری کی تعداد بھی بڑھا دی گئی ہے۔ وزیراعلیٰ سندھ نے حملے کی شدید مذمت کی ا ور آئی جی کو واقعہ کی تفصیلی انکوائری کر کے رپورٹ دینے کی ہدایت کی ہے۔