کچے میں آپریشن، 30 لاکھ سر کی قیمت والا ڈاکو بھائی سمیت ہلاک
کراچی (نوائے وقت رپورٹ) کچے کے علاقے میں رینجرز اور پولیس کے آپریشن میں بدنام زمانہ امداد بھیو بھائی سمیت مارا گیا جبکہ اس کے پانچ ساتھیوں کو زخمی حالت میں گرفتار کر کے تین ہندو تاجروں کو باحفاظت بازیاب کرا لیا گیا۔ امداد بھیو اپنے ساتھیوں سمیت کچے کے علاقے میں موجود تھا۔ رینجرز اور پولیس نے علاقے کو گھیرے میں لیا۔ ڈاکوؤں نے فائرنگ کر دی۔ رینجرز اور پولیس کی جوابی فائرنگ سے بدنام زمانہ امداد بھیو اپنے بھائی نظیر سمیت مارا گیا۔ رینجرز نے پانچ جرائم پیشہ کو زخمی حالت میں گرفتار کر کے اسلحہ برآمد کر کے تین ہندو تاجروں کو باحفاظت بازیاب کرا لیا۔ مرنے والے امداد بھیو کے سر کی قیمت حکومت سندھ نے 30 لاکھ روپے مقرر کی تھی۔ بھیو نے تین ہندو تاجر اور پانچ بنک ملازمین و اغوا کر کے ان سے تاوان وصول کیا تھا۔ دریں اثناء رحیم یار خان کالے والی میں سونمیائی کے رہائشی علی میر محمد کے فارم سے سپروائزر 60 سالہ سلیم کو اغوا کر لیا گیا۔
