لاہور، بیجنگ (سپیشل کارسپانڈنٹ) شنگھائی تعاون تنظیم (SCO) ممالک کا گرین ڈویلپمنٹ فورم کا اجلاس  8 جولائی کو چین کے صوبہ شان ڈونگ کے شہر چنگ ڈاؤ میں شروع ہوا۔  جس میں قریباً 350 چینی اور غیر ملکی نمائندوں نے شرکت کی۔ فورم کا مقصد "SCO گرین ڈیویلپمنٹ پارٹنرشپ" کی تعمیر اور پائیدار ترقی کو فروغ دینے کا اقدام ، SCO کے رکن ممالک کے درمیان سبز توانائی، سبز صنعت، موسمیاتی تبدیلی سے نمٹنے اور ماحولیاتی تحفظ جیسے شعبوں میں گہرے تعاون کو آگے بڑھانا ہے۔ فورم کے انعقاد کے موقع پر نوائے وقت میڈیا گروپ کے چیف آپریٹنگ آفیسر لیفٹیننٹ کرنل (ر) سید احمد ندیم قادری اور ایس سی او کے سیکرٹری جنرل ژانگ منگ کے درمیان ملاقات ہوئی۔  دونوں نے پاک چین دوستی کے فروغ سمیت اس شعبے میں پاکستان، چین اور ممبر ممالک کے درمیان تعاون اور اس سلسلے میں میڈیا بالخصوص پاکستانی میڈیا کے مثبت کردار پر تبادلہ خیال کیا۔  اس موقع پر لیفٹیننٹ کرنل (ر) سید احمد ندیم قادری اور ایس سی او کے ڈپٹی سیکرٹری جنرل شری جنیش کین  کے درمیان بھی ملاقات ہوئی اور باہمی دلچسپی کے امور پر گفتگو ہوئی۔  کرنل (ر) قادری نے امید ظاہر کی کہ صدر شی جن پنگ کے وژن کی روشنی میں کانفرنس اپنے مقاصد حاصل کرے گی۔  انہوں نے یہ بھی توقع ظاہر کی کہ پاکستانی حکومت فورم کے مقرر کردہ مقاصد کے حصول کے لیے اپنا مثبت کردار ادا کرے گی۔