گجرات؍ اسلام آباد  (خبر نگار خصوصی+ سٹاف رپورٹر+این این آئی) میجر راجہ عزیز بھٹی شہید نشان حیدر کا 59واں یوم شہادت جمعرات کو منایا گیا۔آئی ایس پی آر کے مطابق میجر عزیز بھٹی نے 1965ء کی جنگ میں وطن کے دفاع میں جان کا نذرانہ پیش کیا۔ میجر عزیز بھٹی کی فرض شناسی، عزم اور قربانی کو ہمیشہ یاد رکھا جائے گا۔ نشان حیدر یافتہ میجر راجہ عزیز بھٹی شہید کے 59 ویں یومِ شہادت پر تقریب کا انعقاد کیا گیا۔ میجر راجہ عزیز بھٹی شہید کے 59ویں یوم شہادت پر گجرات میں شہید کے مزار پر تقریب انعقاد کیا گیا، جہاں پر پاک فوج کے دستے کی سلامی پیش کی۔ شہید کے مزار پر پھول رکھے گئے اور فاتحہ خوانی کی گئی۔ آئی ایس پی آر کے مطابق میجر عزیز بھٹی نے 1965ء کی جنگ میں وطن کے دفاع میں جان کا نذرانہ پیش کیا۔ میجر عزیز بھٹی کی فرض شناسی، عزم اور قربانی کو ہمیشہ یاد رکھا جائے گا۔ دوسری جانب صدرِ مملکت آصف علی زرداری نے میجر عزیز بھٹی شہید کے یومِ شہادت پر خراجِ عقیدت پیش کرتے ہوئے کہا ہے کہ پوری قوم میجر عزیز بھٹی کی بے مثال قربانی اور بہادری کو سلام پیش کرتی ہے۔ انہوں نے کہا کہ میجر عزیز بھٹی نے 1965ء کی جنگ میں جواں مردی سے دفاع کا فریضہ سرانجام دیا۔ میجر عزیز بھٹی کی لازوال قربانی ہمارے لیے ایک روشن مثال ہے۔ وزیرِ اعظم شہباز شریف نے میجر عزیز بھٹی شہید کو خراج عقیدت پیش کرتے ہوئے کہا ہے کہ میجر عزیز بھٹی شہید نے اپنی جرات و شجاعت سے دشمن کے ناپاک عزائم کو خاک میں ملایا۔ انہوں نے کہا کہ میجر عزیز بھٹی شہید کی وطن کے دفاع کے لیے قربانی کو تاریخ میں سنہری حروف سے لکھا جائے گا۔ ان کا وطن کی خاطر جان کی پراوہ کیے بغیر دشمن سے لڑنے کا جذبہ قابل تقلید ہے۔ سپیکر قومی اسمبلی ایاز صادق نے میجر عزیز بھٹی شہید کو خراج عقیدت کرتے ہوئے کہا کہ 1965ء پوری قوم ان کی بے مثال بہادری و شجاعت کو سلام پیش کرتی ہے۔ شہداء قوم کے ہیرو ہیں، ان کی قربانیوں کو ہمیشہ یاد رکھا جائے گا۔ جبکہ  وفاقی وزیر داخلہ محسن نقوی نے جنگ ستمبر 1965 ء کے ہیرو میجر عزیز بھٹی شہید کو شاندار الفاظ میں خراج عقیدت پیش کرتے ہوئے کہا ہے کہ میجر عزیز بھٹی شہید نے دفاع وطن کے لئے اپنی  جان نچھاور  کر دی۔ جمعرات کو اپنے بیان میں وزیر داخلہ محسن نقوی کا کہنا تھا کہ میجر عزیز بھٹی شہید نے شجاعت اور جرات کی داستان رقم کی۔